سلام يالشيون
وش رايكم نعود ورى شوي ونتذكر الطفوله الماصله حقتنا.
ونشوف مدبلجات الأطفال اللي بوقتنا ...تأثيرها علينا ..وانطباعاتنا عنها
كنت إذا بدا المدبلج ما أجلس عالجلسه أخذ المخده وانسدح عند التلفزيون ..واكيد انتم مثلي
واذا اشتد الموقف تلاقوني واقف قدام الشاشة هي دموع هو تكسر اصابع من كثر الحماس انا ووجهي ...
1- كابتن ماجد
الكابتن ماجد نجم الملعب نجم راد حساس ومهذب يعرف ان اللعب مهاره يصنع فن اهداف متواصلتممممممممم والاخلاص تجعله النجم المحبوب تفتح للفوز الافاق تمتممممتممممم
الى الان حاقد عليه هالخكري
سحب فينا تسحيب بالله فيه هجمة تستمر 3 حلقات
لو ملعبهم من الرياض للقصيم أمداه وصل
لاوخلوعنكم الهجمه قعدت ثلاث ايام تهون عند نقزه ماجد اللي قعد يبترم بالهواء حلقه ونص ولا هذيك الكرة الضربة المزدوجه بين ماجد وياسين وقعدت حلقه وحده وهي تبترم على الشاشه طاعون ما نشوف الا هالكورة تدور يا تسيف ما احولينا والمشكله اننا نتابعه باخلاص
ولاش رايكم بحركة التوامان منير وأنور (اللي لهم ضروس )مااحد فكر يجربها ؟؟
وإذا خلص يجيني حماس غير طبيعي وبالحوش أقوم أطبق كل اللي شفته
ويصيبني إحباط ..ليش ماأنقز مثل نقزاته ؟؟
2-بشار
مااواطنه ذا بعد
سحبنا فينا 90 حلقة واللي يقهر تمر امه من جنبه مايشوفها هو وعيونه اللي مبققها على قلة سنع
وقمت من تفاعلي وأحط يديني على سماعة التلفزيون وأصرخ وأقول :الله ياخذك عمرك وامك شف امك وراك جعل راسك للفقش
كنه بيسمعني ..ويقوم يطير هو وراسه الكبير ..ومن القهر طفيت التلفزيون
وكان حامل هموم غيره (جابلي الضغط )
يعني افضل حل انك تشوف أول حلقة واخر حلقة
3- عدنان ولينا
عدنان ولينااااااااااا اماني حلوه حلوه الصداقه عدنان يتخطى الصعاب عدنان عدنان عدنان عدنان عدنان ولينا
اما عن عدنان ولينا ... وما ادراك ما عدنان انا ما يذبحني الا اصابع رجلينه .. كنت اقلده لدرجة اني كنت افر موجة التلفزيون باصبع رجلي
وعدنان هذا ولد معجزه ..أبوك يالحب
واحلى شي نامق يوم يحك وجهه بالسقف
والا عبسي المهبول يقول قبل يشوف لينا :هل لينا شي يؤكل ؟؟
ماقد شاف بنات بحياته..
لا تخبرون شلخة عدنان ولينا اول ما تبدأ الحلقه الاولى ....
في عام 2002 سوف يتغير العالم ... وسوف تختفي الحياة .. وسيكون الدمار في العالم .. وسوف تحترق الدنيا بأسرها ... ولن تكون هناك حياة بشريه على وجهه الارض
والله وجاء عام 2007 وحنا نسوي ترامس هالشاهي ونحمس هالحب وهاتها فصفصة .. وماغير نديور مديور بالاكل وما عندنا من الشيطان طاري
4- ساالي
اااااااااه انا قصه انسان انا جرح الزمان انا سااااااااالي ساااااالي...
ساااااالي سااااالي اعيش في وقع المطر في ضوء القمر ساااااالي ساااالي
كنت اطالعها وعقب ما تخلص الحلقه ارقى غرفتي واصيح لحالي <<<---- مب لازم ياخي تتابع
بس ربي عطاها على قد نيتها
اكثر شي يعجبني فساتينها ودي اشتري لام الكمخه منها
بس الظاهر انها ماتنزل بالاسواق ..(أكيد ابوها صاحب اكبر منجم الماس)
وعروستها اللي احلا منها (ايميلي) <<<-- شوفو الاسم ..
5- هايدي ..
وياعيني على هايدي ...بنت جبال الألب السويسريه
ماافك الفشار والببسي الا لابدت
وكنت أتمنى أركب على السحاب مثلها ..واتسدح واتقلب على طعوسهم الخضر (ماهي مثل طعوسنا العاذريه والثمامه)
وصديقها بيتر العربجي ابو سنون متفرقات اللي يكره المدرسه ...
6- ليدي
...وما أدراك ماليدي
هذي بنت حمولتن سنعه
شقرا ...وخيّاله ...وش تبون بعد ؟؟
ما أنسى شكلها بالمسابقه النهائيه فاكه الشعر ..ولابسه أحمر ..وحصانها أبيض
<<<---وكالعاده على أعصابي لما فازت على أخر لحظه
ومرت أبوها الشريره (البارونا )..أكرها هي وعيالها الماصلين
كنت معجب بقووه بذا الاشقر ارثر والله اني انقهر منه اطخم وش زينه
وهالساره ياااربيه ياسحرها تعجبني خياليه هالبنت
بس بصراحه ...هالمدبلج بالذات ...ماينسى
بالنهاية كنت متابع مخلص ..واخش جو ..وأصدق كل شي
يللللله كل واحد يقول لنا عن سوالفه أيام الطفوله ..وش يحب وش يكره وش اللي اثر فيه من افلام الكرتون؟؟؟
